\u2018Henkie, H\u00e8\u00e8\u00e8\u00e8nkie, kom dan by de frou\u2019, r\u00f4p Anneke \u00fbnder de beam skean tsjinoer \u00fas praktyk yn Grou. Har stim sloech suver oer. Anneke is boerinne. Neist in keppel kij binne der op \u2018e pleats katten, in herdersh\u00fbn en in parkyt. Like maklik as Anneke yn \u2018e melkst\u00e2l stiet te melken, komt sy mei ien fan har bisten by \u00fas op it sprekoere. In echte bistefreon, by wa\u2019t it eltse dei dieredei is. Dit kear soe Anneke wer nei\u2019t sprekoere, mar de pasjint \u00fbntkaam har. Henkie siet yn syn koai yn \u2018e kofferbak fan \u2018e auto. It doarke fan \u2018e koai wie net goed beskoattele, dat de parkyt fleach by it iependwaan fan de klep linea recta boppe yn \u2018e beam. Henkie seach it swurk driuwen en kaam net. De wurklju fan it bedriuw oan de oare kant fan de dyk skuorden harren de b\u00fbsen \u00fat en beg\u00fbnen Anneke nei te bauwen: \u2018Henkie, kom dan jong, kom \u00fat dy beam wei!\u2019. It tafal woe nammentlik dat ien fan dy mannen ek Henkie hjitte. Anneke waard der suver nitelich fan: \u2018Stean d\u00ear net sa stom te gnizen, helje leaver in ljedder foar my!\u2019<\/p>\n
Op datselde stuit wie ik drok dwaande mei it sprekoere. By \u00fas yn \u2018e praktyk is it ek dei \u00fat, dei yn dieredei. W\u00earom soene wy op fjouwer oktober mear \u00fas b\u00east dwaan moatte as oare dagen? Sels hawwe wy th\u00fas ek bisten dy\u2019t alle dagen oant yn \u2018e gr\u00fbn bedoarn wurde. D\u00ear hoege se allinne mar leaf foar te w\u00eazen! Dieredei is lykas heite- en memmedei ommers foaral in kommersjele \u00fatwaaks.<\/p>\n
It bart wol ris faker dat bisten \u00fatnaaie. Se bedarje dan \u00fateinlik faak yn in asyl. En sa bel\u00e2nje wy op it m\u00ead d\u00ear\u2019t dieredei by \u00fatstek op syn plak is! Al hoe fantastysk de f\u00fbnlingen d\u00ear harren gerak ek krije, it is pas echt feest as se troch immen ophelle wurde. Der kin op fjouwer oktober noait te min omtinken j\u00fbn wurde oan de bisten yn it diere-asyl. Wie it d\u00ear mar alle dagen dieredei!<\/p>\n
W\u00ear\u2019t Henkie bedarre is? Ik haw net sjoen hoe\u2019t Anneke it foarelkoar krigen hat, mar it is har mei de ljedder al slagge him te fangen! Hja hat my by de behanneling fan Henkie\u2019s kalksnaffel har ferslach dien en se hie sels wakker wille om it foarfal. Koartlyn wie Anneke der wer. No mei de herdersh\u00fbn, in boereh\u00fbn s\u00fbnder line fansels. \u2018Tink der om dat se net \u00fatnaait!\u2019, warsk\u00f4ge ik har. \u2018Lokkich kin sy net fleane\u2019, lake Anneke.<\/p>\n
Oktober 2004 (F-side fan de Ljouwerter Krante)<\/p>\n","protected":false},"excerpt":{"rendered":"